Alveg ótrúleg saga.

Gamalt blogg frá árinu 2005.


Það getur oft verið gott á búa á litla Íslandi og það á Akureyri!

Ég fékk undarlegt símtal um daginn sem hljómaði svona:

Kona hinum megin á línunni: Já komdu sæl, ég veit að þetta hljómar kannski skringilega.. en ekki ert þú barnabarn Önnu Friðriks í Þórunnarstræti?

Ég: ha.. jú reyndar, af hverju?

Konan: æi ég er nefnilega apótekarinn hennar. Við vorum að senda lyf til hennar áðan og hún svaraði ekki en það var kveikt á ljósi inni hjá henni. Ég var svo hrædd um að eitthvað hefði komið fyrir hana. Veistu eitthvað hvar hún er eða hvort nokkuð hafi komið fyrir?

Ég: nei ég vona nú að það sé allt í lagi ég skal athuga þetta, renni bara til hennar. En hvernig vissir þú að ég væri barnabarn hennar?

Konan: ég fór nú bara í símaskránna og hringdi allar Önnur Friðriksdætur á Akureyri og tók sénsinn á því að ein þeirra væri barnabarn hennar.......


Finnst ykkur þetta ekki merkilegt! Apótekarinn þekkir okkur ömmu ekkert en ákvað að reyna að hafa uppi á nöfnu hennar!!! Það er sko sannarlega notagildi í því að vera skírður í höfuðið á ömmu sinni:0)

Þetta kalla ég hugulsemi af stærstu gerð!

Þetta er bara einn stór misskilningur!

Misskilningur hefur alltaf verið stór partur af mínu lífi, ég veld gjarnan misskilningi með afar furðulegu skopskyni og misskil fólk í tíma og ótíma. En þegar kemur að því að misskilja eitthvað alla sína ævi þá erum við að tala um allt annan hlut. Þá er ég að tala um eins og þegar maður heldur að október sé oktomber o.s.frv.

Ég á yngri systur, 8 árum yngri en ég. Hún hefur ætíð átt hug minn og hjarta og alist upp mér við hlið. Síðustu daga hefur hún algjörlega farið á kostum í vitleysunni, þ.e. að uppljóstra misskilningi lífs hennar :)

Á þriðjudaginn var hún hjá mér að vinna ritgerð. Það hafði snjóað þannig að færðin hjá planinu mínu var ekki góð og hún að sínum gellubíl sat hálf föst þannig að fremsti hluti bílsins losnaði. Erla hringdi í Trausta bróður og sagði: Gætir þú lagað stuðulinn hjá mér? Ég var hjá Önnu og STUÐULLINN datt næstum af!!!!!!!!

Það þarf ekki að spyrja að því, ég kafnaði næstum úr hlátri og gerði stanslaust grín af henni. Nema þá að í dag toppaði hún þetta og það ekkert smá!

Hún var að segja mér frá stelpu sem er ólétt og er við það að fara að eiga. Erla mín orðaði þetta svona: Ég sá hana sko í gær og hún er barasta alveg komin á STEYPIREYÐINN!!!!!!!!!

Þarna var mér allri lokið. Ég hló svo mikið að ég missti næstum þvag, fékk magakrampa, var hreinlega óhuggandi af hlátri :-)

HHAHAHAHAA... hvað finnst ykkur um þetta?

Brúðkaupsveilan - Fyrsti hluti

Það hefur nú varla farið fram hjá nokkrum manni að við Heimir ætlum að drattast upp að altarinu í sumar. Ég hef heitið sjálfri mér að verða ekki þessi manneskja sem verður heltekin af undirbúningnum, ætla að halda ró minni og það sem skiptir öllu máli er: Ekkert stress!

Við hjúin áttum í mesta basli við að koma gestalistanum saman, eftir nokkrar rimmur klíndist hann saman með nokkrum já-um og nei-um og fýluköstum. Þegar kom að boðskortagerð fengum við kast! Mér stóð á sama hvernig þau litu út en þegar greyið Heimir stakk upp á einhverju fannst mér það bara ljótt og hallærislegt. Annað hvort of væmið, of ó-fyndið, of ljótt, of asnalegt o.s.frv. Þá sendi ég neyðarbréf til Tótu sem svaraði kallinu. Gott að eiga góða vini.

Kjóllinn er hausverkur og það að komast í kjól sem er ekki EXTRA BIG. Kjóllinn þarf líka að líta vel út, vera töff en samt ekki einum of. Má ekki vera rjómatertulegur og í réttri sídd. Maður vill nú líta ágætlega út þennan dag og byrjar því nýtt ár á að kaupa sér kort í ræktina, hættir að borða nammi og drekka gos, borðar hollt og ég veit ekki hvað og hvað. Hver nennir samt að lifa svoleiðis lífi endalaust? Ekki ég! Fann lausnina í þætti á Skjá einum um daginn: AÐHALDSBUXUR OG STROKKUR. Nauðsynlegt til að fá mitti og allt hvað eina, gæti jafnvel fengið eitthvað til að stækka brjóstin. Hver veit? Til að bjarga þessu réð ég besta kjólaklæðskerann á landinu sem vill svo heppilega til að er vinkona mín. Gott að eiga góða vini.

Það er oft gott að eiga Heimi að, ekki bara af því að hann er svo yndislegur og góður heldur líka því hann getur togað í spotta. Hann er svona semi celeb á Akureyri og þekkir helstu tónlistargúrúin. Gott að eiga góðan unnusta.

Ég á haug af vinum. Allir vilja leggjast á eitt og hjálpa. Fanney Dóra er með bestu bragðlaukana norðan heiða og hefur boðið þá fram. Gott að eiga góða vini.



Án vina væri þetta ekki hægt!

Tak så meget

Skúbbið

Tvær búðir á Glerártorgi voru með sérstaka opnun fyrir starfsmenn bankanna rétt fyrir jól. Allir starfsmenn bankanna, sem eiga svo erfitt út af kreppunni, fengu 25% afslátt af öllum vörum.

Moggablogg

Þetta fyrirbæri Moggablogg er kjánalegt. Fólk tengir bloggið sitt við fréttir á mbl.is til að lýsa skoðun sinni á þeim. Yfirleitt eru þessi blogg fáránleg og of oft óviðeigandi. Rakst á eitt í dag sem trónir á toppnum yfir ömurlegustu færslu allra tíma. Ekki það að ég sé einhver flott pía sem bloggar eins og drottningin! Ég stóðst bara ekki mátið að setja linkinn hér inn og er þ.a.l. orðin ein af nöldrandi bloggurum landsins:)

Þið megið dæma. Hér --> http://gleymmerei.blog.is/blog/gleymmerei/entry/722008/

HAHHAAHAA

Going South

Jæja, þá er pæjan að fara í borgina á föstudaginn. En sökum annríkis þá verð ég að fara aftur með síðustu vél á laugardaginn.

Þannig að stúlkur mínar, I'm available :)


Mæli svo með ráðstefnunni sem ég verð á. Kostar ekkert inn, engin skráning. Sjá hér: http://www.hi.is/en/vidburdir/radstefna_um_lifsleikni_i_skolum

Frítt Tal í Tal - Já ókí..


Ég hef áður tjáð mig um hið hrikalega fyrirtæki Tal, þ.e. ömurlegu þjónustuna þeirra. Ég skráði mig í Tal til þess eins að lækka símreikninginn. Það gekk náttúrulega ljómandi vel þegar ég var "á milli" fyrirtækja og borgaði ekki krónu!

Svo rann sá dagur upp að Tal hrökk í gang og ég allt í einu, þremur mánuðum seinna, var orðin skráður viðskiptavinur fyrirtækisins.

Það er skemmst frá því að segja að Heimir er líka í Tali, svo við gætum hringt frítt á milli.

Það er galli á gjöf Njarðar. Ég skráði Heimi sem símavin samviskusamlega og hann mig. Svo fæ ég símareikning og á yfirlitinu sé ég að ég er að borga öll símtöl til Heimis. Ég rýk á þjónustusíðuna þeirra til að tékka með þennan blessaða símavin. Þá er þetta bara fjandi flókið, það er ekki nóg að virkja'nn einu sinni. Heldur þarf maður að gera það á 30 daga fresti. Ókey, allt í lagi. Ég virkjaði hann þá bara aftur... en viti menn það var ekki hægt AF því að ég er ekki virkjuð hjá honum.

Nú spyr ég, þurfum við að gera þetta samtímis?? Hann getur ekki virkjað mig, því ég er ekki virkjuð hjá honum.. Djöfuls rugl!!!


Ég segi nú bara: maður gerir ekki neitt fyrir neinn, sem gerir ekki neitt fyrir neinn.

Svo sný ég mér í hring.. og annan..